Ministria e Jashtme e Italisë njoftoi se gazetarja Cecilia Sala, e cila ndodhej në Iran për të kryer “veprimtarinë e saj gazetareske”, është arrestuar nga policia në Teheran më 19 dhjetor. Sala, e njohur për podkastin e saj “Stories”, ku trajton jetën në vendet përreth botës, u arrestua pa u dhënë një arsye e saktë për këtë veprim.

Sipas Ministrisë, ambasadori italian në Teheran e vizitoi gazetarën për të verifikuar kushtet dhe gjendjen e saj në paraburgim, ku ajo pati mundësinë të bënte dy telefonata me familjen e saj. Më 17 dhjetor, Sala kishte postuar një podkast nga Teherani, duke diskutuar për patriarkatin në kryeqytetin iranian.

Irani ka qenë shpesh i kritikuar për arrestimin e shtetasve me shtetësi të dyfishtë dhe të qytetarëve perëndimorë, duke i përdorur ata si mjet për trysni ndaj shteteve perëndimore. Kjo ngjarje vjen pas disa rasteve të ngjashme, përfshirë arrestimin dhe dënimin me 10 vjet burg të gazetarit amerikan-iranian, Reza Valizadeh.