Kryetari i Grupit Parlamentar të Partisë Demokratike, Gazment Bardhi, reagoi ndaj deklaratave të Komisioneres së Zgjerimit të BE-së, Marta Kos, pas intervistës së saj për Politico.

Bardhi e konsideroi të papranueshëm qëndrimin e komisioneres, duke theksuar se ajo ka bërë përgjegjëse shoqërinë shqiptare për korrupsionin në vend:

“Shoqëria shqiptare nuk e pranon korrupsionin, shqiptarët nuk janë të korruptuar.”

Ai shtoi se përgjegjësia për korrupsionin është individuale dhe i takon kryeministrit Edi Rama, duke përmendur rastin e zëvendëskryeministres Belinda Balluku, për të cilën tha se është mbrojtur politikisht nga mazhoranca në Kuvend.

Bardhi theksoi gjithashtu se SPAK nuk pengohet nga shoqëria shqiptare, por nga ndërhyrjet politike, duke kërkuar që institucionet europiane të distancohen nga deklarata të tilla, të cilat i cilësoi fyese dhe të papërshtatshme për një shoqëri që, sipas tij, mbetet ndër më proeuropianet në botë.