Kryeministrja italiane, Giorgia Meloni, i ka bërë homazh kujtimit të stilistit legjendar Giorgio Armani në një artikull për “Corriere della Sera”, duke theksuar ndikimin e tij të jashtëzakonshëm në modën dhe kulturën italiane.

“Esenca e ‘Made in Italy’ është një kombinim talenti, vëmendjeje ndaj detajeve dhe kujdesit për punonjësit tanë. Këto karakteristika i bëjnë kompanitë tona të vlerësuara dhe të dashura në të gjithë botën dhe te Armani ato kanë gjetur një sintezë madhështore. Ai ndihmoi në ngritjen e shkëlqimit italian në stilin e veshjeve në një nivel ndërkombëtar, duke trajnuar breza profesionistësh,” shkruan Meloni.

Ajo kujton me emocion edhe momentet personale që lidhen me krijimet e stilistit: “Krijimet e tij kanë shoqëruar disa nga momentet më domethënëse të jetës sime. Midis tyre, ceremonia e betimit në Quirinale si kryeministre, në të cilën mora pjesë duke veshur një nga kostumet e tij të bukura blu marinë. Dhe ishte një zgjedhje që do ta bëja përsëri, sepse ai kostum Armani përcillte shumë mesazhe: mbrojtjen e ‘Made in Italy’, inovacionin, cilësinë, krenarinë për identitetin e vet”.

Meloni thekson gjithashtu autoritetin dhe ndikimin që Armani la pas: “Pa harruar autoritetin. Një Itali që mund të udhëheqë botën. Kombi ynë nuk do ta harrojë gjenialitetin e tij dhe punën e jashtëzakonshme që bëri për ta bërë atë një simbol të padiskutueshëm dashurie dhe pasioni për bukurinë”.

Giorgio Armani mbetet një ikonë e modës italiane, një simbol i elegancës dhe i talentit që ka vendosur standarde ndërkombëtare për stilin dhe artin e të veshurit.