Policia Kufitare e Kakavijës ka finalizuar operacionin e koduar “Modifikimi”, duke parandaluar një tentativë për trafikim të drogës drejt Greqisë.

Gjatë kontrolleve intensive, duke përdorur teknologji të avancuar dhe qenin antidrogë, u zbuluan 60 pako me lëndë narkotike Cannabis Sativa, me peshë totale 63.2 kilogramë, të fshehura në parafangot dhe shasinë e një automjeti.

Si rezultat, u arrestuan Osman Kamberaj (44 vjeç) dhe Enkeleda Xhemali (45 vjeçe), të dy banues në Fier, të cilët akuzohen për “Trafikim të lëndëve narkotike” në bashkëpunim. Gjatë kontrollit fizik, policia gjeti dhe sekuestroi 1890 euro, së bashku me tre celularë dhe automjetin e përdorur për transportin e drogës.

Operacioni u krye në bashkëpunim me DVP Fier dhe Prokurorinë e Gjirokastrës, e cila po vijon hetimet për identifikimin e personave të tjerë të përfshirë në këtë veprimtari kriminale. Materialet do t’i kalojnë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme ligjore.