Prokuroria Themelore në Prishtinë ka zbuluar detaje të reja për grabitjen e ndodhur në lagjen Veternik, në oborrin e një qendre tregtare, ku pati edhe të shtëna me armë zjarri, duke lënë dy persona të plagosur.

Sipas komunikatës zyrtare, një person është arrestuar, ndërsa autoritetet po vazhdojnë ndjekjen e personave të tjerë që ndodhen në arrati.

“Prokurori kujdestar është informuar nga Njësiti Policor për rastin e grabitjes. Hetuesit policorë, në bashkëpunim me Prokurorin e Shtetit, kanë ndaluar një (1) person për veprën penale ‘Grabitja’ dhe ‘Mbajtja në pronësi, kontroll ose posedim të paautorizuar të armëve’, ndërsa vijon ndjekja e të dyshuarve të tjerë”, thuhet në njoftimin zyrtar.

Ndërkohë, Prokuroria e Shtetit ka siguruar opinionin publik se është e përkushtuar të bashkëpunojë me organet e rendit për zbardhjen e plotë të ngjarjes dhe kapjen e të gjithë autorëve të përfshirë.