Një grabitje e mirëorganizuar ka tronditur qendrën e Romës në orët e para të së hënës, më 17 nëntor, ku dyqani luksoz Louis Vuitton u godit me makinë nga një bandë prej tre personash të maskuar. Ngjarja u regjistrua në kryqëzimin mes Via Mario dei Fiori dhe Via Condotti, një prej zonave më të frekuentuara dhe prestigjioze të kryeqytetit italian.

Sipas agjencisë ANSA, autorët mbërritën me një automjet dhe e përplasën qëllimisht në fasadën prej xhami të dyqanit, duke e thyer atë dhe duke krijuar një hapje të mjaftueshme për të depërtuar brenda. Dëmet në strukturë u raportuan të konsiderueshme.

Pasi hynë në ambient, grabitësit morën rreth 80 artikuj, kryesisht çanta dhe aksesorë të markës së njohur. Sipas La Repubblica, vlera e sendeve të vjedhura pritet të arrijë në qindra mijëra euro, por shifra zyrtare ende nuk është konfirmuar.

Policia ka sekuestruar pamjet e kamerave të sigurisë së dyqanit dhe bizneseve përreth, ndërsa po heton për të identifikuar autorët dhe për të gjurmuar itinerarin e arratisjes së tyre. Ende nuk dihet nëse automjeti i përdorur ishte i vjedhur apo pjesë e planit të bandës.

Ngjarja ka rikthyer në vëmendje valën e grabitjeve të synuara ndaj dyqaneve të luksit në kryeqytetin italian, ndërsa hetimet vijojnë me intensitet të lartë.