Richard Grenell, i dërguari i presidentit amerikan për Misione të Posaçme, ka akuzuar presidenten e Kosovës, Vjosa Osmani, për “manipulim të fjalëve” të Donald Trump, pas deklaratave të saj në Washington se ish-presidenti amerikan ka parandaluar një përshkallëzim të mundshëm ushtarak nga Serbia ndaj Kosovës.

“Donald Trump është nominuar për Çmimin Nobel për Paqe për punën e tij për normalizimin ekonomik mes Kosovës dhe Serbisë më 2019 dhe 2020, përmes Marrëveshjes së Uashingtonit. Osmani nuk ka qenë pjesë e atij procesi. Pretendimi se ka pasur ndonjë ndërhyrje të re nga ana e tij është absurd,” shkroi Grenell në platformën X.

Deklarata vjen pas vizitës së Osmanit në SHBA, ku ajo nënvizoi rolin e Trumpit në parandalimin e një konflikti të mundshëm në rajon, duke cituar vetë ish-presidentin në deklaratat e tij të fundit.

Trump, në një miting më 29 qershor, kishte deklaruar se kishte parandaluar një luftë në Ballkan, duke thënë: “Serbia po përgatitej për luftë… nuk do ta them se është Kosova, por është Kosova.” Ai shtoi se e kishte ndaluar përshkallëzimin përmes presionit ekonomik, duke u shprehur se SHBA nuk do të tregtonte me palë në konflikt.

Shtëpia e Bardhë nuk ka komentuar deri më tani mbi këto deklarata, ndërsa qeveria në detyrë e Kosovës po ashtu nuk ka dhënë sqarime rreth përshkallëzimit të përmendur nga Osmani. KFOR-i, misioni i NATO-s në Kosovë, ka theksuar rëndësinë e qëndrueshmërisë në rajon, por ka shmangur komentimin e drejtpërdrejtë mbi deklaratat.

Nga ana tjetër, reagimet në Serbi kanë qenë të ashpra. Ministri i Jashtëm serb, Marko Gjuriq, e quajti deklaratën e Osmanit një “manipulim të qëllimshëm” për të fituar vëmendje në Washington, ndërsa presidenti serb Aleksandar Vuçiq mohoi çdo përgatitje për konflikt. “Nuk kemi angazhuar asnjë ushtar, nuk kemi lëvizur asnjë makineri. Ne duam të ndërtojmë, jo të luftojmë,” u shpreh Vuçiq më 12 korrik.

Tensionet Kosovë–Serbi vijojnë të jenë të larta, veçanërisht në veri të Kosovës, ku shumica e popullsisë është serbe. Kujtojmë se në shtator 2023, një grup i armatosur serbësh, i udhëhequr nga Millan Radoiçiq, kreu një sulm ndaj Policisë së Kosovës në fshatin Banjskë, ku u vra një rreshter policie. Kosova e cilësoi sulmin si terrorist dhe akuzoi Serbinë për përfshirje, akuzë që Beogradi e ka mohuar.

Presidentja Osmani pritet të mbajë një konferencë për shtyp pas kthimit të saj nga SHBA, për të adresuar publikisht debatet e fundit dhe qëndrimin e saj lidhur me rolin e SHBA-së dhe situatën e sigurisë në rajon.