Ish-deputeti i Partia Demokratike, Ervin Salianji, zhvilloi një takim me intelektualë në Tiranë, ku u ndal gjerësisht te situata politike dhe funksionimi i demokracisë në vend.

Gjatë fjalës së tij, Salianji theksoi se respektimi i rregullave nga partitë politike është thelbësor për funksionimin e demokracisë, duke paralajmëruar se mungesa e tyre rrezikon vetë sistemin.

“Pa parti që u nënshtrohen rregullave nuk kemi më demokraci. Sot nuk hiqet as dorëheqja si akt sublim. Politika duket sikur ka qëllim jo pjesëmarrjen e intelektualëve dhe qytetarëve, por dekurajim për të mos marrë pjesë në procese”, u shpreh ai.

Sipas tij, debati real mbi çështjet kyçe si ekonomia dhe administrata publike mungon, ndërsa zërat kritikë shpesh perceptohen si të pazakontë.

“Duket sikur debati real mbi ekonominë ose administratën publike nuk ekziston. Duket sikur zërat që reagojnë janë të çuditshëm, kur duhet të ishte e kundërta”, vijoi Salianji.

Ai ngriti gjithashtu shqetësimin për mungesën e zgjedhjeve reale, si brenda partive politike, ashtu edhe në raport me qytetarët dhe përfaqësimin e tyre.

“Mungesë zgjedhjesh reale si në PS, si në PD, mungesë zgjedhjesh reale të qytetarëve të përfaqësuesve të tyre, pasi kemi një sistem ku zgjedhin më shumë krerët e partive”, deklaroi ai.

Në vijim, Salianji u ndal edhe te roli i SPAK, duke e cilësuar atë si një faktor të rëndësishëm në luftën kundër korrupsionit dhe në hapjen e rrugës për një pjesëmarrje të re politike.

“SPAK hapi rrugën për një pjesëmarrje të re politike duke goditur rëndë korrupsionin, që po sjell një ndryshim gradual. Por është në një sulm të vazhdueshëm nga të gjitha palët politike. Duhet t’i jepet ajo që i takon, pasi po u reziston presioneve”, përfundoi ai.