Një shqiptar 45-vjeçar është shpallur në kërkim nga karabinierët në Itali, pasi dyshohet se u hodh me makinë në ujërat e portit të Cattolica-s së bashku me gruan e tij, pas një grindjeje të dhunshme mes tyre.

Ngjarja ndodhi të mërkurën pasdite, rreth orës 16:00, duke shkaktuar panik te personat që ndodheshin në port.

Sipas raportimeve të mediave italiane, çifti ndodhej në një Volkswagen Golf kur, pas një konflikti të ashpër, 45-vjeçari, banues në San Giovanni in Marignano, dyshohet se e drejtoi automjetin me shpejtësi drejt kalatës dhe u përplas me ujërat e portit.

Nga përplasja, dyert e automjetit u hapën dhe, ndërsa Golf-i po fundosej, burri dhe gruaja arritën të dilnin nga kabina.

Disa persona që ndodheshin pranë portit u hodhën në det dhe ndihmuan çiftin të dilte në breg.

Në vendngjarje mbërritën menjëherë ambulancat e 118-s, zjarrfikësit, karabinierët dhe efektivët e Kapitenerisë së Portit. Personeli mjekësor u dha ndihmën e parë të dyve.

Por situata mori një tjetër kthesë pak më vonë. Sapo u përmend, shqiptari 45-vjeçar u largua mes shkëmbinjve dhe humbi gjurmët. Karabinierët kanë nisur kërkimet për lokalizimin dhe arrestimin e tij.

Gruaja, një 40-vjeçare italiane, e cila ndodhej në gjendje shoku pas ngjarjes, u transportua në spital. Sipas informacioneve të para, ajo nuk është në rrezik për jetën.

Ishte arrestuar një ditë më parë

45-vjeçari ishte i njohur për forcat e rendit. Vetëm një ditë para ngjarjes, ai ishte arrestuar nga karabinierët për rezistencë ndaj autoriteteve, pas një tjetër konflikti me gruan.

Ndërkohë, vijojnë operacionet në port për nxjerrjen e Volkswagen Golf-it nga ujërat, ndërsa hetuesit po punojnë për të zbardhur plotësisht dinamikën e ngjarjes dhe rrethanat që çuan në konfliktin mes çiftit.