Ylli norvegjez i Manchester City, Erling Haaland, ka reaguar me modesti ndaj krahasimeve që shpesh bëhen mes tij dhe dy legjendave të futbollit botëror, Lionel Messi dhe Cristiano Ronaldo.

Gjatë konferencës për shtyp në prag të ndeshjes së Champions League kundër ish-skuadrës së tij, Borussia Dortmund, Haaland u shpreh:

“A jam si Messi dhe Ronaldo? Jo, aspak. Jam shumë larg. Askush nuk mund t’u afrohet atyre.”

Sulmuesi 24-vjeçar ka qenë në formë të jashtëzakonshme që prej mbërritjes në Premier League, ku tashmë mban rekordin për më shumë gola në një sezon të vetëm. Vetëm në këtë edicion, ai ka realizuar 13 gola në 10 ndeshje, më shumë se çdo tjetër lojtar në kampionat.

Norvegjezi është gjithashtu lojtari më i shpejtë në histori që ka arritur 50 gola në Premier League, ndërsa synon tashmë rekordin legjendar të Alan Shearer me 260 gola.

“E njoh këtë rekord, është i Shearer. Por kjo është gjëja e fundit që kam në mendje. Dua vetëm të ndihmoj ekipin të fitojë ndeshje futbolli. Ky është qëllimi im kryesor,” – shtoi ai.

Edhe pse flet me përulësi, statistikat e Haaland flasin vetë: me 98 gola në 107 ndeshje për Manchester Cityn, ai është në rrugën e duhur për të thyer çdo rekord dhe për të hyrë në historinë e futbollit krahas më të mëdhenjve.