Ministria e Punëve të Brendshme e Maqedonisë së Veriut njoftoi nisjen e një hetimi ndaj priftit që zhvilloi një ceremoni fetare duke bekuar automjetet zyrtare të policisë brenda oborrit të Ministrisë.

Sipas deklaratës së MPB-së, Departamenti për Kontroll të Brendshëm, Hetime Penale dhe Standarde Profesionale po ndërmerr masat e nevojshme për të përcaktuar rrethanat e ngjarjes, ndërsa publiku do të informohet për rezultatet pas përfundimit të hetimeve.

Fotografitë e shpërndara në rrjetet sociale tregojnë priftin duke kryer shenjtërimin e automjeteve pranë oficerëve policorë, një veprim që ka shkaktuar reagime të përziera. Një pjesë e qytetarëve e shohin këtë si një akt simbolik fetar për mbrojtjen dhe sigurinë e mjeteve, ndërsa të tjerët e konsiderojnë praktikën si një shkelje të parimit kushtetues të sekularizmit dhe mospërputhje me neutralitetin fetar të institucioneve shtetërore.

Ngjarja ka rihapur debatin mbi kufirin mes traditave fetare dhe funksionimit të institucioneve laike, si dhe nevojën për rregulla të qarta dhe llogaridhënie në hapësirën publike. Reagime të ngjashme pati edhe një vit më parë, kur një ceremoni fetare u zhvillua brenda ambientit të Kuvendit.