Ish-presidenti i Brazilit, Jair Bolsonaro, u rikthye në burg të mërkurën, pas një serie ekzaminimesh mjekësore në spital për një goditje të lehtë në kokë që pësoi pas një rrëzimi. Lajmin e bëri të ditur bashkëshortja e tij, Michelle Bolsonaro, përmes një postimi në Instagram.

Mjeku i tij, Brazil Caiado, deklaroi se ekzaminimet – përfshirë skaner (CT) dhe rezonancë magnetike (MRI) – konfirmuan një dëmtim të lehtë traumatik të trurit, pa dëmtime intrakraniale. Ai shtoi se simptomat e mundshme, si marramendja dhe humbja e ekuilibrit, mund të jenë të lidhura me medikamentet që Bolsonaro merr për trajtimin e lemzës.

Dalja e përkohshme nga burgu u lejua nga gjyqtari i Gjykatës së Lartë të Brazilit, Alexandre de Moraes, i cili kishte refuzuar më parë kërkesën për transferim të menjëhershëm në spital, duke argumentuar se nuk kishte urgjencë mjekësore.

Bolsonaro po vuan një dënim prej 27 vitesh burg për planifikim të një grushti shteti pas humbjes në zgjedhjet presidenciale të vitit 2022 ndaj Luiz Inácio Lula da Silva. Ai ka pasur gjithashtu një histori të gjatë probleme shëndetësore, duke përfshirë plagosjen me thikë gjatë një mitingu elektoral në vitin 2018, si dhe ndërhyrje të mëvonshme për hernie dhe trajtimin e lemzës.