Policia e Vlorës ka arrestuar 43-vjeçarin Arbër Shollaj, pasi rezultonte një person i shpallur në kërkim për një ngjarje të rëndë të ndodhur më 31 dhjetor, ku tentoi të vriste me armë 36-vjeçarin Shkëlzen Gjoni.

Ngjarja u shënuar në lagjen “Uji i Ftohtë”, në ambientet e një lavazhi, ku 43-vjeçari tentoi të futej pa radhë për të larë makinën, por u kundërshtua nga punonjësi i lavazhit.

43-vjeçari mori armën që dispononte dhe qëlloi në drejtim të 36 vjeçarit, pa i shkaktuar dëmtime.

Njoftimi i  policisë:

Tentoi ta vriste me armë zjarri 36-vjeçarin, mesditën e datës 31.12.2021, kapet dhe vihet në pranga 43-vjeçari.

Në vijim të punës për kapjen dhe vënien para përgjegjësisë ligjore të shtetasve të shpallur në kërkim, nga specialistët e Seksionit për Krimet në Komisariatin e Policisë Vlorë u bë kapja dhe ndalimi i shtetasit: A. Sh., 43 vjeç, banues në Vlorë.

Ky shtetas ishte shpallur në kërkim për veprat penale “Vrasja me dashje” mbetur në tentativë dhe “Armëmbajtja pa leje”, pasi më datë 31.12.2021, në lagjen “Uji i Ftohtë”, në ambientet e një lavazhi, gjatë një konflikti për motive të dobëta ka qëlluar me armë zjarri në drejtim të shtetasit Sh. Gj., 36 vjeç, pa i shkaktuar dëmtime.

Materialet i kaluan Prokurorisë, për veprime të mëtejshme.