Gjendja shëndetësore e Vera Ruanit, 31-vjeçares me shtetësi angleze e cila u shpëtua nga mbytja pas një aksidenti në detin e Durrësit gjatë një lëvizjeje me motor uji, është stabilizuar dhe ajo tashmë ndodhet jashtë rrezikut për jetën.

E reja u transferua të dielën pasdite nga urgjenca në repartin e patologjisë në Spitalin Rajonal të Durrësit. Sipas burimeve mjekësore, ajo iu nënshtrua të gjitha analizave, rezonancës magnetike dhe grafisë së mushkërive, të cilat rezultuan pa probleme.

Aktualisht, Vera po mbahet në spital vetëm për procedura administrative, përfshirë pajisjen me dokumente identifikimi dhe verifikimin e qëndrimit të saj në Shqipëri, pasi nuk ka më shqetësime shëndetësore.

Zbardhet rrëfimi i saj për aksidentin tragjik

Në dëshminë dhënë grupit hetimor, Vera Ruani ka shpjeguar me detaje dinamikën e aksidentit ku humbi jetën shoku i saj, Silvester Dheug. Dy të rinjtë kishin marrë me qira një motor uji, të pajisur me jelekë shpëtimi, por jo me skafandra.

Sapo kaluan korridorin e lëvizjes, në një distancë prej rreth 150 metrash nga bregu, përballë “pallatit monstër” në Shkëmbin e Kavajës, Dheug bëri një manovër rrethore me shpejtësi, e cila rezultoi fatale. Mjeti u përmbys dhe të dy ranë në ujë. Vera u shkëput menjëherë, ndërsa shoku i saj mbeti nën mjet, ku dyshohet se u asfiksua.

Një patrullë kufitare, që ndodhej në breg, reagoi menjëherë dhe u erdhi në ndihmë. Vera ka treguar se në ato momente ishte e vetëdijshme, ndërsa Silvesteri ende merrte frymë, por ndërroi jetë pak minuta më pas, ndërsa po transportohej me skafin e kufirit drejt kalatës 0, ku i priste autoambulanca.

Ngjarja ka tronditur opinionin publik, ndërsa autoritetet vijojnë hetimet për të përcaktuar përgjegjësitë dhe kushtet teknike të qirasë së mjetit ujor.