Lagja nr. 3 e Sarandës u trondit mbrëmjen e sotme nga një shpërthim i fuqishëm me eksploziv, ku mbeti i vrarë Isuf Jacaj, 58-vjeç, i njohur nga policia si person me precedentë penalë. Trupi i tij u gjet pranë automjetit të shkatërruar nga shpërthimi.

Jacaj ishte babai i Klaus Jacajt, 31 vjeç, aktualisht në burg për “përkrahje të autorit të krimit” lidhur me ngjarjen e datës 17 korrik 2025, kur Ramadan Zoto plagosi me armë Gëzim Hajdaraj dhe Ernest Lamën në lagjen nr. 4 të Sarandës. Më 21 korrik, një person i maskuar vendosi eksploziv tek automjeti i Klaus Jacajt, duke e shkatërruar atë plotësisht – një ngjarje që ende nuk është zbardhur nga autoritetet.

Policia po vijon hetimet për identifikimin dhe kapjen e autorëve të shpërthimit, ndërsa ngjarja ka shkaktuar frikë dhe shqetësim në komunitetin lokal.