Drejtori i Përgjithshëm i Policisë së Shtetit, Ilir Proda, është zgjedhur president i Shoqatës së Shefave të Policisë të Evropës Juglindore (SEPCA). Ai do të mbajë këtë post deri në dhjetor të vitit 2025, duke drejtuar bashkëpunimin rajonal për të luftuar krimin dhe për të garantuar sigurinë.

Në fjalën e tij, Proda shprehu angazhimin e tij dhe të Policisë Shqiptare për të përforcuar bashkëpunimin operacional ndërmjet vendeve të rajonit, duke theksuar:

“Ne jemi punonjës policie dhe kemi një mision: luftë pa kompromis krimit për të garantuar sigurinë e qytetarëve të vendeve tona.”

Ai vlerësoi mbështetjen e agjencive ndërkombëtare, përfshirë Interpolin dhe Europolin, duke e cilësuar si një nxitje për përmirësimin e vazhdueshëm të punës policore.

Çështjet kryesore të diskutuara në Asamblenë e Përgjithshme të SEPCA-s:

“Ju siguroj për angazhimin tim maksimal në krye të SEPCA-s dhe të Policisë së Shtetit Shqiptar për të punuar bashkërisht duke thelluar më shumë bashkëpunimin e deritanishëm. Ne jemi punonjës policie dhe kemi një mision: luftë pa kompromis krimit për të garantuar sigurinë e qytetarëve të vendeve tona. Te Policia e Shtetit Shqiptar do të gjeni angazhim, përkushtim, vendosmëri dhe besueshmëri për të zhvilluar hetime dhe operacione të përbashkëta. Pjesëmarrja e presidentit të Interpolit dhe përfaqësuesve të tjerë të agjencive ligjzbatuese është tregues i mbështetjes dhe besimit që ata kanë te puna jonë, dhe kjo na obligon për të ecur përpara, duke korrigjuar ato që s’kemi bërë mirë dhe duke ndërmarrë hapat e duhur për të parandaluar e goditur krimet globale që kërcënojnë mbarë botën, me qëllim që të mundësojmë sundimin e ligjit dhe krijimin e një ambienti sa më të pasigurt për ata që shkelin ligjin.”

Në Asamblenë e Përgjithshme, e cila u mbajt në Beograd, morën pjesë Drejtorët e Përgjithshëm të Policisë së vendeve anëtare të SEPCA-s, Koordinatorët Kombëtarë, si dhe personalitete të rëndësishme ndërkombëtare, si:

•Presidenti i Interpolit, Dr. Ahmed Naser Al Raisi.
•Ministri i Brendshëm i Serbisë, Ivica Dačić.
•Përfaqësues të organizatave ndërkombëtare si OSBE, Europol, Cepol, dhe ambasada e SHBA-së në Beograd.

Ilir Proda, gjatë takimeve me homologët dhe përfaqësuesit e agjencive ligjzbatuese, riafirmoi përkushtimin e tij për të forcuar bashkëpunimin dhe për të zhvilluar operacione të përbashkëta që synojnë krijimin e një ambienti më të sigurt dhe mbrojtjen e ligjit.