Teksa ekipet e emergjencës vijojnë kërkimet për të mbijetuarit pas tërmeteve të fuqishme që goditën Venezuelën, teknologjia po luan një rol kyç në koordinimin e operacioneve të shpëtimit.

NASA, Microsoft dhe Bashkimi Evropian kanë vënë në funksion sisteme të avancuara të inteligjencës artificiale dhe analizës gjeohapësinore për të identifikuar brenda pak orësh zonat më të prekura nga fatkeqësia.

NASA, në bashkëpunim me studiues të Oregon State University, po analizon imazhet radarike të marra para dhe pas tërmetit për të evidentuar ndryshimet në terren dhe dëmtimet e mundshme të ndërtesave. Vlerësimet paraprake tregojnë se rreth 59 mijë ndërtesa mund të jenë dëmtuar ose shkatërruar.

Një rol të rëndësishëm ka edhe programi evropian Copernicus, ndërsa satelitët Sentinel-1 të operuar nga Bashkimi Evropian dhe European Space Agency ofrojnë imazhe me rezolucion të lartë, të cilat mundësojnë matjen e lëvizjeve të tokës dhe identifikimin e objekteve të dëmtuara.

Ndërkohë, Microsoft ka zhvilluar modele të inteligjencës artificiale që analizojnë automatikisht mijëra imazhe satelitore, duke klasifikuar ndërtesat sipas nivelit të mundshëm të dëmtimit. Kjo u mundëson autoriteteve të përqendrojnë ekipet e shpëtimit në zonat me rrezikun më të lartë.

Të gjitha këto të dhëna publikohen në platformën humanitare Humanitarian Data Exchange, ku qeveritë, organizatat humanitare dhe ekipet e emergjencës mund të konsultojnë harta të përditësuara të dëmeve pothuajse në kohë reale, duke përmirësuar koordinimin e operacioneve të kërkim-shpëtimit.