Ish-kreu i Kadastrës, Artan Lame, u paraqit këtë mesditë në Prokurorinë e Posaçme Antikorrupsion.
Pas daljes nga ambientet e SPAK, Lame tha para mediave se është thirrur në cilësinë e personit që ka dijeni, në lidhje me një ngjarje që ka të bëjë me Kadastrën.
“Jam thirrur si person në dijeni për një çështje që është nën hetim nga SPAK dhe ka lidhje me Kadastrën,” – tha Artan Lame.
Sipas informacioneve, Lame është thirrur për të dhënë shpjegime lidhur me një dosje të SPAK që ka të bëjë me legalizime në këmbim të votës për zgjedhjet lokale të vitit 2019. Në lidhje me këtë çështje, disa persona, përfshirë një ish-punonjës i Aluiznit dhe një ish-kryeplak, janë vënë në pranga pak kohë më parë.
Lame ka drejtuar Agjencinë Shtetërore të Kadastrës për katër vite, institucion ky i cili u krijua si bashkim i ALUIZNI-t me Hipotekën. Ai dha dorëheqjen nga ky post në mars të vitit të kaluar dhe në vend të tij u emërua Dallëndyshe Bici.
