Ish zv/drejtori i Kadastrës në Durrës u arrestua sot (12 prill 2024) pas dyshimeve për bashkëpunim në tjetërsimin e 448 mijë metra katrorë tokë shteti në qytetin bregdetar të Durrësit.

Bashkë me të u arrestuan edhe dy juristë të tjerë.

Bëhet fjalë për 20 tituj pronësie në total 448 mijë metra katrorë tokë pranë universitetit të Durrësit ’Aleksandër Moisiu” në zonën e Spitallës. Ky tjetërsim ka ardhur si pasojë e dokumentacioneve të falsifikuara dhe shpërdorimit të detyrave zyrtare në Kadastrën e Durrësit.

Pas një hetimi të zgjatur, gjykata e Durrësit firmosi sekuestro preventive mbi këto tituj pronësie për të parandaluar tjetërsimin e tyre në të ardhmen.

Gjatë hetimit, u zbulua se ekzistonin dyshime të forta për përfshirjen e personave të ndryshëm në këtë skemë të paligjshme, duke përfshirë punonjësit e Agjencisë Shtetërore të Kadastrës (ASHK) Durrës.

Në mesin e personave të arrestuar, përveç ish zv/drejtorit të Kadastrës, ndodhen edhe pronarët e tjetë të paligjshëm të tokës, të cilët akuzohen për vepra të tjetërsimit dhe mashtrimit. Gjithashtu, ka edhe dy persona që janë në kërkim.

Hetimet po vazhdojnë për të identifikuar plotësisht përfshirjen dhe rolin e çdo personi në këtë skemë kriminale.