Zbardhen detaje të reja nga hetimet për ngjarjen e rëndë në të cilën mbeti i plagosur Martin Cani pas një konflikti mes të miturve që përshkallëzoi deri në përdorimin e thikës. Grupi hetimor ka marrë dëshminë e shokut të tij, Luis Meçe, i cili ndodhet në spitalin e Traumës, në praninë e psikologes dhe familjarëve.

Sipas dëshmisë së Luis Meçes, përveç autorit të arrestuar, një tjetër person me iniciale G.B., shok i autorit, ka qenë i përfshirë në sulm. Ai ka deklaruar se autori kryesor mbante një thikë më të madhe, ndërsa personi tjetër një thikë më të vogël, dhe të dy kanë kryer sulme ndaj tij dhe Martin Canit.

Zhvillime të reja në hetime

Bazuar në dëshminë e Meçes dhe analizën e kamerave të sigurisë, hetuesit kanë ngritur dyshime për përfshirjen e dy autorëve në përdorimin e thikave të ndryshme. Pamjet konfirmojnë se pas sulmit, autori i arrestuar dhe dy bashkëmoshatarë të tjerë janë larguar me vrap deri në zonën e ish-ATSH, ku u gjetën një çantë dhe një thikë.

Dyshohet gjithashtu se një person i paidentifikuar i ka marrë me makinë të miturit nga vendngjarja. Kamerat në këtë zonë po këqyren sërish për të konfirmuar këtë pistë. Gjithashtu, është zbuluar se thika e gjetur nga policia nuk përputhet me atë që autori i arrestuar ka publikuar në rrjete sociale pas ngjarjes, duke shtuar dyshimet për përfshirjen e një thike tjetër në sulm.

Veprimet e mëtejshme

Për të ndriçuar plotësisht këtë çështje, hetuesit kanë vendosur të:

•Rimarrin në pyetje gjithë stafin e shkollës “Fan Noli” dhe dëshmitarët e pranishëm.
•Analizojnë me kujdes të gjitha pamjet nga kamerat e sigurisë në zonën e ngjarjes dhe përreth.
•Rikërkojnë telefonat celularë të autorit të arrestuar dhe dy shokëve të tij, që ende nuk janë gjetur.

Këto dëshmi dhe zhvillime të reja po i japin një rrjedhë tjetër hetimeve, duke forcuar dyshimet për përfshirjen e më shumë se një personi në këtë ngjarje të rëndë.