Mario Draghi është caktuar kryeministër i Italisë pas një takimi që zhvilloi të premten me Presidentin Sergio Mattarella. Ish-shefi i Bankës Qendrore dhe kabineti i tij i ministrave do të betohen të shtunën. Administrata e Draghi-t do të marrë detyrën zyrtarisht javën e ardhshme pas aprovimit në Dhomën e Ulët dhe Senat.

Mocioni i besimit është thjesht një formalitet, pasi të gjitha partitë kanë shprehur mbështetjen ndaj Draghi-t. Kriza politike në Itali u shkaktua muajin e kaluar me tërheqjen nga koalicioni të partisë Italia Viva të Matteo Renzi-t. Conte u dorëhoq pavarësisht se i mbijetoi dy mocioneve të mosbesimit me shpresën që të arrinte një koalicion të ri, por nuk mundi që ta realizonte kkëtë gjë.

Tashmë shteti italian do të drejtohet nga një 73-vjeçar i cili njihet për aftësitë e tij në drejtimin e Bankës Qendrore Europiane në momentet më të vështira të kontinentit të vjetër, kriza ekonomike. Draghi ka marrë mbështetjen e Lëvizjes 5 Yjet, Partisë Demokratike, partisë Forza Italia, Italia Viva dhe Lega-s. Kaq i mjaftojnë “Super Mario” për të nisur nga detyra.