Izrael – Ministri izraelit i Mbrojtjes, Israel Katz, njoftoi nisjen e një raundi të ri sulmesh ndaj objektivave iraniane, duke paralajmëruar se Teherani do të bëhet “Bejrut”, referuar shkatërrimit masiv që mund të pësojë kryeqyteti iranian. Katz theksoi se ushtria izraelite do të vazhdojë të godasë vendet kyçe të Iranit dhe do ta “zhveshë nga lëkura e gjarprit” regjimin iranian, duke synuar dobësimin e kapaciteteve bërthamore dhe armëve të tij.
“Diktatori iranian po e shndërron Teheranin në Bejrut dhe banorët e tij në pengje për hir të mbijetesës së regjimit të tij”, deklaroi Katz në një qëndrim të prerë.
Në të njëjtën kohë, ushtria izraelite i bëri thirrje iranianëve që jetojnë pranë fabrikave dhe objekteve të prodhimit të armëve që të evakuohen menjëherë, përmes një paralajmërimi të publikuar në mediat sociale në arabisht dhe persisht. Ky paralajmërim përfshin të gjitha fabrikat e armëve dhe objektet mbështetëse në territorin iranian.
Nga ana e vet, Ministri i Jashtëm iranian, Abbas Araghchi, ripërsëriti kërcënimet kundër Izraelit, duke paralajmëruar se sulmet ndaj territorit izraelit do të vazhdojnë, ndërsa akuzoi Shtetet e Bashkuara për bashkëpunim në agresionin kundër Republikës Islamike. Ai theksoi se “mbrojtja jonë është absolutisht e ligjshme” dhe se përgjigjet iraniane do të ndalen vetëm nëse ndalet agresioni izraelit.
Nga konfliktet e fundit, sipas bilancit të fundit të publikuar nga Zyra e Kryeministrit izraelit, janë regjistruar të paktën 13 të vdekur, mes tyre edhe tre fëmijë. Nga qindra të plagosur, nëntë ndodhen në gjendje të rëndë, 30 kanë lëndime jo kërcënuese për jetën dhe 341 lëndime të lehta.
Në përgjigje të sulmeve, Irani ka lëshuar rreth 80 raketa balistike kundër Izraelit, duke goditur veçanërisht objektet e furnizimit me karburant për forcat ajrore izraelite. Forcat Ajrore Izraelite kanë bombarduar gjatë natës disa lëshues raketash balistike iraniane, sisteme mbrojtjeje ajrore dhe radarë, si pjesë e përpjekjeve për të parandaluar sulme të mëtejshme.
Ushtria izraelite (IDF) njoftoi se do të vazhdojë të “godasë” këto objekte në Iranin perëndimor për të penguar sulmet raketore ndaj Izraelit.
