Pas tri barazimeve pa gola, Juventusi i drejtuar nga trajneri Tiago Motta përgatitet për sfidën kundër Xhenoas në Marasi, me synimin për të rigjetur golin dhe fitoren. Në prag të ndeshjes, Motta ka ndarë pritshmëritë e tij dhe ka zbuluar formacionin që do të zbresë në fushë.
Trajneri theksoi rëndësinë e kontrollit të lojës dhe sulmit të organizuar për të krijuar mundësi shënimi:
“Do të përballemi me një skuadër të vështirë si çdo ekip në Serinë A. Duhet të imponojmë stilin tonë dhe të krijojmë sa më shumë hapësira në sulm,” tha ai.
PËRGATITJA
“Kemi punuar shumë gjatë javës, veçanërisht në goditjet nga jashtë zone. Duhet të sulmojmë me shumë lojtarë për të krijuar situata të favorshme,” vazhdoi Motta.
VLAHOVIC
Sa i përket sulmuesit kryesor, Dushan Vlahovic, Motta u shpreh:
“Dushan po bën një punë të shkëlqyer. Është thelbësore që skuadra të ndërtojë mirë lojën nga pas, në mënyrë që ai të ketë më shumë mundësi për të finalizuar. Skuadra ka nevojë për të njësoj si ai për ne.”
NDESHJA PA TIFOZË
Një nga shqetësimet e trajnerit është mungesa e tifozëve në stadium:
“Është mëkat që ndeshja do të luhet pa tifozë. Futbolli është sporti më i bukur në botë dhe stadiumet duhet të jenë të mbushura me njerëz që festojnë dhe shijojnë spektaklin.”
SULMI DHE LOJA E SKUADRËS
Trajneri nuk është i shqetësuar për mungesën e golave deri më tani, duke theksuar se e gjithë skuadra duhet të kontribuojë në fazën ofensive:
“Faza sulmuese nuk varet vetëm nga një lojtar. Kemi bërë një hap të rëndësishëm përpara kundër Napolit, duke kontrolluar topin ndaj një skuadre të madhe. Duhet t’i krijojmë më shumë mundësi sulmuesve dhe mesfushorëve për të dhënë më të mirën.”
RIKTHIMET NË SKUADËR
Motta përmendi rikthimet e rëndësishme në skuadër, përfshirë edhe kthimin e lojtarit Gati:
“Gati është rikuperuar nga dhimbjet në kavilje dhe do të jetë me grupin, ashtu si dhe Koisensao. Një urim të madh për lindjen e vajzës së tij, Kamila.”
Me një motivim të qartë për të rikthyer golat dhe fitoret, Juventusi synon të dalë me tre pikë nga përballja e radhës.
