Forcat Operacionale kanë arrestuar në Tiranë Aldo Avdylajn, një nga emrat kryesorë të botës së krimit, i shpallur në kërkim pas megaoperacionit të SPAK që goditi grupet famëkeqe të “Rrumit të Shijakut” dhe “Avdylajve”.

Sipas burimeve hetimore, Avdylaj dyshohet të ketë qenë një nga organizatorët dhe drejtuesit e grupit kriminal që ekzekutoi Ermir Bregun në Durrës në vitin 2021.

Pas një periudhe të gjatë në arrati, ai ishte fshehur në një apartament pranë Kopshtit Zoologjik në Tiranë, ku u lokalizua dhe u arrestua pas një operacioni të mirëkoordinuar të Policisë së Shtetit.

Arrestimi i tij konsiderohet një goditje e fortë ndaj strukturave kriminale që operonin mes Tiranës, Durrësit dhe Shijakut, ndërsa hetimet e SPAK pritet të zbulojnë të tjera lidhje të grupit me ngjarje të rënda kriminale të viteve të fundit.