Tiranë/Gjirokastër – Policia ka finalizuar me sukses operacionin e koduar “Wanted”, duke arrestuar një 47-vjeçar të shpallur në kërkim për trafik droge.

Sipas njoftimit zyrtar, Orges Islami, 47 vjeç, banues në Gjirokastër, u lokalizua dhe u arrestua në zonën e “Liqenit të Thatë” në Tiranë. Ai ishte shpallur në kërkim pas një vendimi të Gjykatës së Rrethit Gjyqësor Pogradec më 29 korrik 2020, e cila e kishte dënuar me 6 vite e 8 muaj burg për trafik droge në bashkëpunim. Nga dënimi i dhënë, ai kishte mbetur për të vuajtur edhe 2 vite, 8 muaj e 4 ditë burgim.

Hetimet kanë zbuluar se Orges Islami ishte pjesë e një grupi kriminal aktiv në trafikimin e lëndëve narkotike drejt vendeve të BE-së në vitin 2018. Brenda periudhës 2017-2018, autoritetet kanë zhvilluar 12 operacione kombëtare dhe ndërkombëtare, duke arrestuar 66 persona në Shqipëri, Greqi, Turqi, Maqedoni dhe Itali.

Gjatë këtyre operacioneve u sekuestruan:
8.4 ton lëndë narkotike Cannabis Sativa
Municione luftarake
Automjete dhe telefona
Shuma të konsiderueshme parash

Pas arrestimit, O. Islami u dorëzua shërbimeve të DVP Korçë, ku Seksioni për Hetimin e Narkotikëve procedoi me ndalimin dhe referimin e çështjes në Prokurori për veprime të mëtejshme.

Policia e Shtetit thekson se do të vijojë punën për identifikimin dhe arrestimin e personave të tjerë të përfshirë në aktivitetin kriminal.