Pas dorëheqjeve të nënkryetarëve aktualë, Bashkia e Tiranës ka emëruar katër zëvendësues të rinj që do të prezantohen sot nga kryeministri Edi Rama.
Kush janë emrat e rinj?
• Ilir Mëngra – aktualisht drejtor i DPSHTRR-së dhe me një karrierë të gjatë në administratë e infrastrukturë, do të mbikëqyrë punët publike. Ai rikthehet në Bashkinë e Tiranës, ku më herët ka mbajtur detyra drejtimi.
• Vasilika Vjero – ish-zëvendësministre e Financave (2020–2024), ish-drejtuese e Tatimeve dhe e ARRSH-së. Ajo do të mbulojë sektorin e financave dhe zhvillimit ekonomik.
• Blendi Sulaj – ish-anëtar i PR-së dhe PD-së, kandidat për deputet i PS-së në zgjedhjet e fundit, do të mbikëqyrë territorin dhe zhvillimin rural.
• Gentian Keri – ish-drejtor i Prokurimeve Publike për katër vite, do të drejtojë organizimin e administratës së bashkisë.
Emërimet u miratuan nga grupi i punës i përbërë nga ministrat Blendi Gonxhja, Ogerta Manastirliu dhe Petrit Malaj, pas kërkesës së Ramës për të hapur garën për nënkryetarët e rinj.
Këto ndryshime vijnë në një periudhë kur drejtimi i përkohshëm i Bashkisë Tiranë është marrë personalisht nga kryeministri, pas arrestimit të Erion Veliajt më 10 shkurt 2025.
