I ftuar në emisionin “Big Brother Radio”, Keijsi ka folur për herë të parë pas përjashtimit nga edicioni i pestë i “Big Brother VIP”, i cili erdhi pas hapjes së Zarfit të Zi gjatë spektaklit të mbrëmshëm.

Ish-banori u shpreh se vendimi nuk e ka befasuar, duke theksuar se situatat e akumuluara ditët e fundit brenda shtëpisë kishin çuar drejt këtij përfundimi. Sipas tij, momenti kyç ishte përplasja me Kristin, por edhe reagimet e tij të vazhdueshme ndaj debateve.

“E prisja. Ishin mbledhur shumë gjëra bashkë, ngritja e zërit dhe kundërpërgjigjet e mia,” tha Keijsi.

Ai shpjegoi se debati me Kristin arriti në atë shkallë pasi, sipas tij, ky i fundit kishte bullizuar dhe kërcënuar partneren e tij, Inën.

“Po përpiqesha të kafshoja gjuhën, por nuk e bëra dot më. Ai bullizoi një femër dhe e kërcënoi duke i thënë që do t’ia zhdukte rrobat ose do t’i hidhte në pishinë. Ajo është partnerja ime dhe kam të drejtë ta mbroj,” u shpreh Keijsi.

I pyetur nga moderatorja Elona nëse mendonte se Kristi e kishte “përdorur” Inën për të arritur tek ai, Keijsi u përgjigj pa hezitim: “Absolutisht po”.

Keijsi theksoi se nuk do të kishte bërë asnjë hap pas dhe se nuk ndjen pendesë për veprimet e tij.

“Asnjë mashkull nuk do ta duronte një situatë të tillë me partneren e vet. Nuk jam penduar për asgjë,” përfundoi ai.