Torino – Juventus ka marrë një vendim të prerë për Kenan Yildiz: mesfushori turk, i konsideruar si një nga talentet më të ndritura të futbollit europian, nuk është në shitje. Sipas mediave italiane, përfaqësuesit e klubeve të mëdha si Arsenali dhe Chelsea kanë tentuar ta bindin “Zonjën e Vjetër” me oferta të majme gjatë kësaj merkatoje vere, por drejtuesit bardhezi i kanë refuzuar të gjitha.

Sipas Tuttosport, Juventusi jo vetëm që e ka mbyllur derën për një largim të mundshëm të 19-vjeçarit, por ka gati edhe kontratën e re, e cila pritet të zyrtarizohet sapo agjenti i lojtarit të rikthehet në Torino.

Detajet e marrëveshjes së re
• Afati: deri në vitin 2030
• Rritja e pagës: +1.5 milionë euro neto nga aktualja
• Bonuset: deri në 6 milionë euro në total
• Pozicionimi financiar: Yildiz do të bëhet një nga lojtarët më të paguar të Juventusit, menjëherë pas Dusan Vlahovic, në të njëjtin nivel me Gleison Bremer dhe Jonathan David.

Yildiz shihet si një gurthemeli i projektit të ri të bardhezinjve dhe një nga preferencat kryesore të trajnerit Igor Tudor, i cili e konsideron lojtar kyç për rikthimin e Juventusit në nivelet më të larta të Europës.

Situata te Juventusi

Ndërsa Yildiz ka siguruar të ardhmen e tij në Torino, Dusan Vlahovic ka surprizuar gjithashtu duke qëndruar te Juventusi, ndonëse prej javësh qarkullonin zëra për një largim të mundshëm dhe një rikthim të Kolo Muani.

Këto lëvizje tregojnë se Juventusi po ndërton një bërthamë të re, duke kombinuar talentin e të rinjve me eksperiencën e lojtarëve të afirmuar. Në këtë strategji përforcimesh bën pjesë edhe transferimi i kosovarit Edon Zhegrova, i cili është tashmë zyrtarisht pjesë e Juventusit, pas marrëveshjes prej 14.3 milionë eurosh me Lille.