Një episod i pazakontë ka ndezur polemika në US Open 2025, turneun Grand Slam ku Jannik Sinner po garon si kampion në fuqi. Një video që u bë virale tregonte një burrë duke “rrëmbyer” një kapelë që tenisti polak Kamil Majchrzak (nr. 76 në botë) po ia dhuronte një fëmije pas një ndeshjeje emocionuese.

Brenda pak ditësh, detektivët X dhe mediat sportive identifikuan burrin si Piotr Szczerek, milioner polak, CEO dhe themelues i një kompanie ndërtimi. Pas shpërthimit të reagimeve negative nga tifozët dhe komuniteti sportiv, Szczerek doli publikisht me një deklaratë të gjatë faljeje.

Kërkesa për falje e Piotr Szczerek

“Do të doja t’i kërkoja falje në termat më absolute fëmijës që u lëndua, familjes së tij, të gjithë tifozëve dhe vetë lojtarit,” – shkruan Szczerek.
“Bëra një gabim të rëndë. Në emocionin e momentit, mes gëzimit të turmës pas fitores, isha i bindur se tenisti po më ofronte kapelën për fëmijët e mi, të cilët më parë kishin kërkuar një autograf. Ky besim i gabuar më shtyu të zgjasja dorën instinktivisht.”

Szczerek shpjegoi se e kupton indinjatën publike dhe se tani e sheh veprimin e tij si një “vjedhje të qëllimshme të një suveniri nga një fëmijë”, pavarësisht se nuk ishte qëllimi i tij.

“Kapelja iu kthye djalit dhe familjes së tij dhe iu ofrua një kërkim falje personale. Shpresoj se e kam riparuar të paktën pjesërisht dëmin e shkaktuar.”

Një “mësim i dhimbshëm” për imazhin e tij

Szczerek tha gjithashtu se për vite me radhë ai dhe bashkëshortja e tij kanë mbështetur fëmijët dhe atletët e rinj, por kjo situatë i tregoi se një moment i vetëm mungesë vëmendjeje mund të zhbëjë vite pune.

“Ky është një mësim i dhimbshëm, por i domosdoshëm përulësie për mua,” – deklaroi ai.
“Do të përfshihem edhe më shumë në iniciativa për mbështetjen e fëmijëve dhe të rinjve, si dhe në veprime kundër dhunës dhe urrejtjes. Besoj se vetëm përmes veprimit konkret mund ta rindërtoj besimin e humbur.”

Reagimi i tenistit dhe tifozëve

Kamil Majchrzak, i cili po shpërndante autografe dhe suvenire pas ndeshjes, ende nuk ka bërë një deklaratë publike, por burime pranë kampit të tij konfirmojnë se ai u prek nga situata dhe shpreh keqardhje për fëmijën. Tifozët në rrjete sociale janë ndarë në dy kampe:
• Një pjesë e falenderojnë Szczerek për kërkimin publik të faljes.
• Të tjerë mbeten të ashpër, duke thënë se një CEO milioner duhet të ishte më i kujdesshëm dhe se “të marrësh diçka nga një fëmijë është e pafalshme”.

US Open dhe rregullat e reja

Organizatorët e US Open nuk kanë marrë masa ndëshkuese ndaj Szczerek, pasi kapelja iu kthye pronarit të saj dhe situata u zgjidh shpejt. Megjithatë, incidenti ka hapur diskutime mbi protokollet e sigurisë dhe shpërndarjen e suvenireve pas ndeshjeve.