Kim Kardashian ka bërë një rrëfim të pazakontë nga vitet e para të përpjekjeve të saj për famë, gjatë një bisede në podkastin “Khloé in Wonder Land”. Ajo pranoi se në një moment kishte shfrytëzuar indirekt mikeshën e saj, Britney Spears, për të tërhequr vëmendjen e mediave.

“Fama ishte gjithçka që doja, jetoja për të”, u shpreh Kardashian, duke kujtuar një episod nga fillimi i viteve 2000. Në atë kohë, ajo dhe miku i saj Jonathan Cheban po darkonin me një person që zotëronte një Rolls-Royce Phantom, ndërsa vetë ata nuk arrinin as të gjenin një taksi.

Sipas Kim, ata i kërkuan pronarit të makinës luksoze t’i çonte deri në hotel dhe ai pranoi. Me sugjerimin e Cheban-it, të dy u ulën në sediljet e pasme për t’u dukur sikur kishin shofer personal.

Kur mbërritën në hotel, paparacët po prisnin Britney Spears. Kardashian kujton se fotografët nisën të thërrisnin emrin e saj, duke e pyetur nëse kishte ardhur për të takuar Britney-n. “Mbaje kokën ulur dhe mos thuaj asgjë”, i kishte thënë Cheban.

Të dy hynë në hotel dhe, sipas saj, u fshehën në një kabinë telefonike për rreth 20 minuta, pasi nuk njihnin askënd dhe nuk dinin ku të qëndronin. Ndërsa po largoheshin, paparacët vijuan ta pyesnin: “Kim, si ishte Britney?”

Kardashian tregoi se u larguan me taksi, ndërsa fotografët nuk i ndoqën më, duke menduar se kishin marrë tashmë atë që kërkonin. “Fotot dolën në faqen e parë të çdo reviste. Ne menduam se po bënim namin”, tha ajo.

Kim Kardashian dhe Britney Spears janë njohur në fillim të viteve 2000 përmes mikeshës së përbashkët Paris Hilton dhe, sipas Kim, miqësia e tyre ka vijuar ndër vite. Dyshja janë parë së bashku edhe në nëntorin e kaluar.