Mbyllja e Ngushticës së Hormuzit ka krijuar sfida të mëdha për ekonomitë që varen nga importet e naftës, por Kina duket se po del një nga përfitueset kryesore të kësaj situate. Ky është vlerësimi i firmës amerikane të konsulencës The Asia Group, në një raport të publikuar së fundmi.

Sipas raportit, Pekini ka arritur të zbusë ndikimin e krizës falë diversifikimit të burimeve të furnizimit me energji dhe përdorimit të rezervave strategjike të naftës.

Ekspertët theksojnë se Kina jo vetëm ka përballuar tronditjen në tregjet globale të energjisë, por ka përfituar edhe nga rritja e eksporteve të teknologjive të energjisë së pastër, duke forcuar pozicionin e saj ekonomik.

Raporti vlerëson gjithashtu se Pekini po e shfrytëzon konfliktin në Iran për të konsoliduar imazhin e tij në arenën ndërkombëtare.

“Ekonomikisht dhe gjeopolitikisht, Pekini po e përdor krizën për ta paraqitur Kinën si partnerin më të besueshëm”, thuhet në raport.

Sipas analizës, udhëheqja kineze e konsideron situatën si një konfirmim të strategjisë së saj për vetëmbështetje industriale dhe reduktim të varësisë nga faktorët e jashtëm.

Megjithatë, ekspertët paralajmërojnë se nëse kriza energjetike zgjatet, edhe Kina mund të përballet me rritje të kostove të lëndëve të para dhe me një ngadalësim të ekonomisë globale, çka do të ndikonte në kërkesën për eksportet e saj.

Pavarësisht këtyre rreziqeve, The Asia Group vlerëson se ekonomia kineze mbetet aktualisht në një pozicion më të favorshëm se shumë ekonomi të tjera, falë aftësisë për të përballuar paqëndrueshmërinë e krijuar nga kriza energjetike në Lindjen e Mesme.