Tiranë — Në Kryegjyshatën Botërore Bektashiane është mbajtur Konferenca Jubilare me rastin e 35-vjetorit të rihapjes së kësaj qendre shpirtërore pas rënies së regjimit komunist.
Gjatë fjalës së tij, Kryegjyshi Botëror Bektashian, Haxhi Baba Dede Edmond Brahimi, theksoi se kjo ngjarje shënon një moment mjaft të rëndësishëm, pasi përkon me tri ngjarje të mëdha historike për komunitetin: 35-vjetorin e rihapjes së Kryegjyshatës Botërore, 15-vjetorin e drejtimit të tij në krye të këtij komuniteti, si dhe 11-vjetorin e përurimit të kompleksit mbarëbotëror.
Kreu i bektashinjve e cilësoi këtë ditë si një dëshmi të pashlyeshme të vazhdimësisë dhe besimit:
> “Kujtojmë sot 35-vjetorin e rihapjes së Kryegjyshatës botërore. Konferenca mbahet në një ditë të veçantë të Kryegjyshatës, ku shënohen tre pika: 35-vjetori i rihapjes së Kryegjyshatës, 15-vjetori si drejtues i Kryegjyshatës dhe 11-vjetorin e hapjes së kompleksit. Kjo është jo vetëm ditë historike por dëshmi e gjallë e ringritjes, përkushtimit dhe besimit. Festojmë këtë përvjetor së bashku me komunitetet e tjera fetare”, tha ai.
>
Bashkëjetesa ndërfetare në qendër të aktivitetit
Në këtë tryezë jubilare morën pjesë përfaqësues të lartë të institucioneve, trupit diplomatik dhe krerë të komuniteteve të tjera fetare në vend. Aktivitetet vlerësuan rolin e bektashizmit në ruajtjen e harmonisë ndërfetare, dialogut dhe solidaritetit mes shqiptarëve.