Blogerja e njohur Klea Prenga ka reaguar në Instagram pas dhunës që përjetoi në një restorant luksoz në zonën e Kodrës së Diellit. Ngjarja ka tërhequr vëmendje të madhe, veçanërisht pas spekulimeve se sulmi kishte lidhje me një marrëdhënie jashtëmartesore. Prenga, në një deklaratë të qartë dhe të vendosur, hodhi poshtë këto akuza, duke sqaruar se personi që e dhunoi nuk ka bashkëshort dhe se ajo nuk i ka ndërhyrë askujt në familje.

“Kur dikush më sulmoi pa të drejtë, duke sjellë akuza të pabaza dhe duke ndërhyrë në jetën time, ndjeva që është e nevojshme të mbrohem,” shkroi ajo. Prenga theksoi se akuza të tilla janë të tepërta dhe të papërgjegjshme, duke shtuar se sjellja e dhunuesit reflekton më shumë për vetë atë sesa për të.

Ajo gjithashtu përshkroi personin që e sulmoi si dikë me vetëbesim të ulët, që beson se mund të fitojë gjithçka me forcë, duke theksuar se fuqia e vërtetë qëndron në dinjitet dhe në zgjedhjen për të mos u ulur në të njëjtin nivel me ata që përhapin negativitet.

“Është e rëndësishme të kuptojmë se sjellja e tyre është një reflektim më shumë për to sesa për ne. Njerëzit që sulmojnë të tjerët shpesh e bëjnë këtë për të mbuluar pasiguritë e tyre,” shtoi ajo. Prenga përfundoi mesazhin e saj me një deklaratë të fuqishme për të vazhduar përpara me kokën lart, duke mos lejuar që negativiteti i të tjerëve ta rrëzojë.