Kreu i SPAK, Klodian Braho, raportoi më 3 mars përpara përfaqësuesve të Komisionit Europian në Bruksel lidhur me progresin e Shqipërisë në kapitujt 23 dhe 24 të negociatave të anëtarësimit, që përfshijnë gjyqësorin, të drejtat themelore dhe luftën kundër korrupsionit.

Braho i përgjigjej pyetjeve të DG ENEST, Drejtoria e Përgjithshme për Zgjerimin dhe Fqinjësinë Lindore, gjatë mbledhjes së 7-të të Komitetit të Drejtësisë dhe Sigurisë, ku u diskutuan reformat kyçe për integrimin. Fokus ishte pavarësia e gjyqësorit, forcimi i sundimit të ligjit dhe veprimet konkrete kundër korrupsionit dhe krimit të organizuar.

Raporti i SPAK është thelbësor për vendimmarrjen e shteteve anëtare të BE-së mbi dritën jeshile të raportit paraprak IBAR për Shqipërinë dhe për vijimin e mbylljes së kapitujve të negociatave. Sipas Komisionit Europian, roli i SPAK dhe GJKKO në hetimin dhe gjykimin e rasteve të korrupsionit dhe krimit të organizuar mbetet një shtyllë kyçe e reformës në drejtësi të vitit 2016, duke krijuar një historik më të besueshëm në këtë fushë, përfshirë edhe hetimin e zyrtarëve të nivelit të lartë.