Komandanti i KFOR-it, gjeneralmajor Özkan Ulutaş, ka pritur në selinë e misionit në Camp Film City, në Prishtinë, të ngarkuarën me punë të Shteteve të Bashkuara në Kosovë, Anu Prattipati.

Sipas njoftimit të KFOR-it, gjatë takimit është diskutuar për situatën e sigurisë në Kosovë dhe në rajon. Ulutaş ka ritheksuar përkushtimin e misionit të udhëhequr nga NATO për ruajtjen e një ambienti të sigurt për të gjithë qytetarët.

Takimi u zhvillua në prag të përfundimit të mandatit të Ulutaşit në krye të KFOR-it, i cili pritet të përmbyllet në mesin e tetorit.

Me këtë rast, komandanti i KFOR-it ka falënderuar Prattipatin për mbështetjen dhe bashkëpunimin e vazhdueshëm, ndërsa ka shprehur mirënjohje për kontributin e Shteteve të Bashkuara në misionin e KFOR-it.

KFOR-i ka rikujtuar se vazhdon zbatimin e mandatit të tij në bazë të Rezolutës 1244 të Këshillit të Sigurimit të OKB-së, me synim garantimin e një mjedisi të sigurt dhe lirisë së lëvizjes për të gjithë njerëzit që jetojnë në Kosovë.

Misioni ka theksuar gjithashtu se vepron në mënyrë të paanshme dhe në koordinim me Policinë e Kosovës dhe EULEX-in, në përputhje me përgjegjësitë e tyre përkatëse në fushën e sigurisë.