Hetimet për shpërthimin vdekjeprurës në Plaka, ku humbën jetën gjashtë persona, janë përqendruar në katin e dytë të ndërtesës, instalimin e gazit natyror dhe, mbi të gjitha, në identifikimin e pikës së saktë të rrjedhjes.

Në të njëjtën kohë, priten përgjigje të rëndësishme nga raportet mjeko-ligjore dhe testet toksikologjike të viktimave.

Sipas mediave greke, pas përfundimit tragjik të operacionit të kërkim-shpëtimit në rrënojat e ndërtesës në rrugën Lysikratous, vëmendja tashmë është zhvendosur te zbardhja e shkaqeve të shpërthimit.

Një ekip prej dhjetë oficerësh të specializuar nga Divizioni i Krimeve të Zjarrvënieve po kryen këqyrjen e vendit të ngjarjes, duke regjistruar dhe mbledhur prova nga ndërtesa.

Epiqendra e hetimit është apartamenti në katin e dytë, ku jetonte një çift i moshuar. Të dhënat e deritanishme tregojnë se shpërthimi më i madh ka ndodhur në këtë hapësirë. Sipas informacionit të disponueshëm, ky ishte i vetmi apartament në ndërtesë me furnizim autonom aktiv me gaz natyror.

Ekspertët po shqyrtojnë tubat dhe pjesët e instalimit, në përpjekje për të përcaktuar burimin dhe mekanizmin e shpërthimit. Një rrjedhje gazi natyror në rrjetin e brendshëm mbetet skenari kryesor që po hetohet, por ende nuk ka një përfundim përfundimtar.

Mundësia e një shpërthimi nga një bombol propani po përjashtohet, pasi deri më tani nuk është gjetur ndonjë element që ta mbështesë këtë pistë. Po ashtu, nuk ka të dhëna për një rrjedhje nga ndonjë ndërtesë fqinje drejt godinës trekatëshe në rrugën Lysikratous.

Një rëndësi të veçantë në këtë fazë ka lidhja e gjetjeve teknike me rezultatet e ekzaminimeve mjeko-ligjore dhe toksikologjike.

Siç thekson Michael E. Avgouleas, shef i zjarrfikësve në detyrë dhe ekspert mjeko-ligjor, rezultatet zyrtare të raporteve mjeko-ligjore dhe ekzaminimeve toksikologjike do të luajnë një rol kyç në sqarimin e rrethanave dhe shkaqeve të shpërthimit dhe zjarrit, në kombinim me identifikimin e pikës së saktë të rrjedhjes.

Ai ka vënë në dukje gjithashtu një dimension më të gjerë të tragjedisë, duke theksuar se shpërthimi dhe zjarri pasues, që shkaktuan gjashtë viktima në Plaka, nxjerrin në pah boshllëqet e sigurisë në përdorimin e gazit natyror.

Avgouleas ka përmendur në mënyrë të veçantë edhe akomodimet me qira afatshkurtër, duke iu referuar konfuzionit fillestar lidhur me numrin dhe vendndodhjet e personave të bllokuar në ndërtesë.

Sipas tij, fakti që për një kohë të gjatë kishte paqartësi mbi numrin dhe vendndodhjen e saktë të personave të bllokuar e bën të domosdoshëm vendosjen e protokolleve më të rrepta të sigurisë në akomodimet me qira afatshkurtër, përfshirë ato të ofruara përmes platformave si Airbnb.

Hetimet vijojnë, ndërsa ekspertët po kërkojnë provën që do t’u mundësojë të përcaktojnë me siguri se ku ndodhi rrjedhja dhe si ajo çoi në shpërthimin dhe zjarrin vdekjeprurës.