Kosova sot është në ditë zie në nderim të policit Afrim Bunjaku i cili u vra të dielën e 24 shtatorit 2023 gjatë përleshjeve me një grup kriminal prej 30 personash të armatosur serbë në veri të Kosovës, në fshatin Banjskë të Zveçanit e banuar me shumicë serbe. Gjatë përleshejeve u plagosën dhe 3 policë si dhe 3 sulmues, ndërsa 6 persona, që dyshohet se ishin në kontakt me grupin kriminal janë arrestuar.

Flamujt e të gjithë institucioneve u ulën sot në gjysmë shtizë dhe do të mbahen nderimet e rastit ndërsa pasdite në orën 16:00 do të mbahet edhe ceremonia e lamtumirës.
Bunjaku do të prehet në varrezat e fshatit Samadrexhë të Vushtrisë.

Kryeministri Albin Kurti deklaroi se operacioni për kapjen e anëtarëve të grupit të armatosur që sulmuan policinë e Kosovës do të vijojë dhe se Policia e Kosovës mbetet në bashkëpunim të ngushtë me KFOR-in dhe EULEX-in dhe se gjatë operacionit ishin sekuestruar qindra armë e municione.

“Në operacionin e sotëm kundër terroristëve të armatosur, Policia e Kosovës, konfiskoi qindra armë dhe municione, duke përfshirë pajisje të rënda ushtarake, si mitralozë, granata e të tjera. Policia jonë mbetet në bashkëpunim të ngushtë me KFOR-in dhe EULEX-in. Operacioni është në vazhdim” shkruajti Kurti në një postim në plaftormën “X”