Emisari i Bashkimit Evropian për dialogun Kosovë-Serbi, Miroslav Lajçak, ka deklaruar se në takimin e kryenegociatorëve të dy vendeve javën e kaluar, janë arritur marrëveshje për disa çështje praktike, por jo për zbatimin e Marrëveshjes në Rrugën drejt Normalizimit. Lajçak, duke bërë një rezyme të punës së tij javore, theksoi se pas më shumë se shtatë orësh diskutimesh intensive me kryenegociatorët Besnik Bislimi dhe Petar Petkoviç, palët ranë dakord për hapat e ardhshëm konkretë për disa çështje praktike, por fatkeqësisht nuk pati përparim në zbatimin e Marrëveshjes për Rrugën drejt Normalizimit.

“Në Bruksel prita kryenegociatorët e Kosovës dhe Serbisë. Pas më shumë se shtatë orësh diskutimesh intensive, ne ramë dakord për hapat e ardhshëm konkretë për disa çështje praktike.

Fatkeqësisht, nuk arritëm përparim në tablonë e madhe, zbatimin e Marrëveshjes për Rrugën drejt Normalizimit.”