Në orët e para të mëngjesit, makina tip “Benz” në pronësi të kryeinxhinierit të OSHEE-së në Durrës është shkrumbuar në lagjen nr. 17, e njohur si ish-URT. Dyshohet se zjarrvënia është e qëllimshme për shkak të detyrës.
Si pasojë e përhapjes së flakëve, është djegur edhe një automjet tjetër i parkuar pranë, në pronësi të E. H. Policia po shqyrton kamerat e sigurisë për të zbardhur dinamikën e ngjarjes.
Në njoftimin e saj, policia deklaroi:
“Në orët e para të mëngjesit, në lagjen nr. 17, në automjetin tip “Benz” të parkuar, në pronësi të shtetasit A. A., ka rënë zjarr. Si pasojë e përhapjes së flakëve është djegur dhe një automjet tjetër, në pronësi të shtetasit E. H., që ishte i parkuar pranë automjetit tip “Benz”. Grupi hetimor, në drejtimin e Prokurorisë, vijon punën për zbardhjen e rrethanave dhe përcaktimin e shkakut të rënies së zjarrit.”
