Një krim i rëndë ka tronditur mesditën e sotme familjen shqiptare në Greqi, ku një 53-vjeçar dyshohet se ka vrarë me thikë bashkëshorten e tij dhe më pas ka tentuar t’i japë fund jetës.

Ngjarja ka ndodhur në zonën e Rodopit, ndërsa viktima është identifikuar si Esma Meço, 44 vjeçe. Bashkëshorti i saj, Bujar Meço, 53 vjeç, nga Gramshi, dyshohet se e ka sulmuar me thikë.

Çifti shqiptar, prindër të tre fëmijëve, u përfshi në ngjarjen e rëndë, rrethanat e së cilës janë ende nën hetim.

Esma Meço u plagos rëndë dhe u transportua me urgjencë në spital, por nuk mundi t’u mbijetonte plagëve dhe ndërroi jetë. Pas sulmit ndaj bashkëshortes, 53-vjeçari dyshohet se ka tentuar vetëvrasjen.

Sipas raportimeve paraprake, një prej fëmijëve të çiftit ka njoftuar autoritetet greke për ngjarjen.

Çifti kishte pasur probleme edhe më herët. Në vitin 2022, në Heraklion të Kretës, Esma Meço kishte bërë kallëzim ndaj bashkëshortit të saj për kërcënim. Në atë kohë, Bujar Meço ishte arrestuar në kuadër të një rasti të lidhur me dhunën në familje.

Autoritetet greke kanë nisur hetimet për të përcaktuar dinamikën e plotë të ngjarjes, motivin dhe rrethanat që çuan në krimin e rëndë.