Kreu i Lëvizjes Bashkë, Arlind Qori, ka reaguar me tone të forta ndaj vendimit të Shqipërisë për të abstenuar në votimin e OKB-së mbi rezolutën që kërkonte armëpushim në Gaza. Në një intervistë për një podcast, Qori e quajti këtë qëndrim “turpëruar” dhe theksoi se vota do të kishte qenë një sinjal për dinjitet, për jetën dhe për njerëzimin.

“Ndërkohë që në Gaza po vazhdon masakra dhe shfarosja e civilëve, Shqipëria abstenon. Kjo është turpëruese. Vota në OKB ishte një votë për njerëzimin – Shqipëria vendosi të mos e jepte,” tha Qori.

Ai kritikoi qeverinë e Benjamin Netanyahut si “ultraekstremiste, ultrashoviniste dhe raciste”, duke theksuar se ajo po përpiqet të shfarosë popullsinë palestineze dhe të kolonizojë territore në shkelje të ligjit ndërkombëtar. Duke iu referuar një analize të “The Guardian”, Qori nënvizoi se 83% e të vrarëve në Gaza janë civilë, ndërsa organizata si Amnesty International kanë cilësuar situatën si gjenocid, me gjykatat ndërkombëtare që po shqyrtojnë këtë njohje zyrtare.

Ai pranoi se Hamasi është një organizatë terroriste, por theksoi se masakrimi i popullsisë civile nuk mund të justifikohet në emër të luftës kundër terrorizmit. “Të zhdukësh një popull për të zhdukur Hamasin është krim kundër njerëzimit. Është gjenocid,” shtoi Qori.

Në përfundim, kreu i Lëvizjes Bashkë theksoi se shqiptarët mund të mos kenë ndikim direkt në konflikt, por kanë mundësinë të mbajnë qëndrim me dinjitet. “Armëpushimi është i vetmi hap drejt lirimit të pengjeve, ndalimit të gjenocidit dhe fillimit të një procesi politik. Çdo popull ka të drejtën për një shtet – edhe palestinezët. Palestina është braktisur nga të gjithë – edhe nga vendet arabe. Një popull po sakrifikohet përpara syve të botës dhe bota po hesht,” përfundoi Qori.