Një ngjarje tronditëse ka shokuar opinionin publik në Shtetet e Bashkuara, ku një çift akuzohet për vrasjen brutale të vajzës së tyre dhe foshnjës së saj të palindur. Sipas mediave amerikane dhe Daily Mirror, viktima është Rebecca Park, e cila ishte vetëm një javë larg lindjes së fëmijës së saj.

Rebecca kishte vizituar shtëpinë e nënës dhe njerkut të saj më 3 nëntor, ndërsa një ditë më pas u raportua e zhdukur nga familjarët. Një dëshmitar ka deklaruar se e kishte parë të hipte në një automjet ditën e zhdukjes. Pas disa ditësh kërkimesh, trupi i saj u gjet në një park kombëtar pranë Liqenit Michigan. Autopsia zbuloi se ajo nuk ishte më shtatzënë, duke ngritur menjëherë dyshime të forta për një krim të rëndë.

Hetimet u përqendruan te nëna e saj, 40-vjeçarja Courtney Bartholomew, dhe bashkëshorti i saj 47-vjeçar, Timothy Bartholomew, të cilët u arrestuan dhe akuzohen për vrasje. Prokurorja e çështjes e cilësoi Courtney-n si “personifikimi i së keqes”, duke deklaruar se çifti jo vetëm që vrau Rebekën, por i nxori me bisturi edhe foshnjën e palindur nga barku.

Sipas prokurorisë, çifti e çoi Rebekën në një zonë pyjore, ku ajo u godit me thikë dhe më pas iu nxor foshnja nga barku, duke i shkaktuar vdekjen si nënës ashtu edhe fëmijës. Trupi i saj u la më pas në pyll. Fillimisht, Courtney mohoi çdo përfshirje, por më vonë ndryshoi dëshminë pasi hetuesit i paraqitën prova që e vendosnin në vendngjarje natën e krimit.

Ajo ka deklaruar se kishte për qëllim ta “shpëtonte” foshnjën dhe t’ia jepte të fejuarit të Rebekës, por sipas saj, foshnja nuk po merrte frymë pas nxjerrjes. Ndërkohë, bashkëshorti i saj ka hedhur fajin te Courtney, duke pretenduar se ajo e kishte planifikuar krimin, e motivuar nga dëshira për të pasur një fëmijë, pasi çifti nuk mund të adoptonte për shkak të së kaluarës së tij kriminale.

Në një tjetër detaj tronditës, hetimet kanë zbuluar se Rebecca, nëna dhe motra e saj dyshohet se kishin lidhje me të njëjtin burrë – të fejuarin e Rebekës. Po ashtu, Courtney ka pretenduar se bashkëshorti i saj ishte babai biologjik i foshnjës.

Autoritetet vijojnë hetimet, ndërsa çështja është cilësuar si një nga krimet më makabre të viteve të fundit në SHBA.