Të tjera detaje të rënda kanë dalë në dritë nga ngjarja e ndodhur këtë të hënë në Qafën e Llogarasë, ku u gjet i djegur brenda një automjeti ish-efektivi i Policisë së Shtetit, Artjon Xhelo.

Sipas burimeve për mediat, Xhelo ka qenë pjesë e Forcave Operacionale “Shqiponjat”, por në vitin 2023 kishte shfaqur probleme të theksuara psikologjike. Për këtë arsye, ai ishte transferuar në Postën e Policisë Poliçan. Gjatë shërbimit atje, ish-efektivit i humbi arma e shërbimit, çka solli një masë disiplinore nga DVP Berat dhe përjashtimin e tij nga radhët e Policisë së Shtetit.

Burimet bëjnë me dije se 35-vjeçari vuante prej kohësh nga depresioni dhe probleme të tjera të shëndetit mendor. Ai u gjet i djegur brenda automjetit të tij tip BMW rreth orës 14:35, ndërsa makina ishte shkrumbuar plotësisht.

Hetimet paraprake dyshojnë se ish-efektivi i ka vënë flakën vetes me benzinë brenda mjetit. Dyshimet forcohen edhe nga dëshmitë e familjarëve, të cilët kanë treguar se Xhelo kishte qenë i shqetësuar për mungesën e punës dhe në bisedën e fundit kishte deklaruar se nuk do të kthehej në shtëpi nëse nuk do të gjente një vend pune atë ditë.

Policia dhe grupi hetimor vijojnë hetimet për të zbardhur plotësisht rrethanat e ngjarjes, ndërsa rasti ka tronditur opinionin publik.