Në mbledhjen e Grupit Parlamentar të Partisë Demokratike, të zhvilluar këtë të hënë, janë diskutuar zhvillimet e pritshme në seancën plenare të së enjtes, puna e komisioneve parlamentare si dhe rendi i ditës në Kuvend.

Një vëmendje e veçantë i është kushtuar aksionit politik të opozitës, si brenda Parlamentit ashtu edhe paralelisht me protestat që zhvillohen jashtë tij. Burime nga mbledhja bëjnë me dije se gjatë diskutimeve është ngritur edhe mundësia e një përshkallëzimi dhe radikalizimi të qëndrimeve opozitare në sallën e Kuvendit.

Deputetët Belind Këlliçi, Klevis Balliu, Saimir Korreshi dhe Bledion Nallbani kanë hedhur për diskutim skenarë të ndryshëm të aksionit opozitar, duke mos përjashtuar edhe variantin ekstrem të një greve urie si formë presioni politik.

Megjithatë, sipas burimeve, ideja e grevës së urisë ka mbetur në nivel diskutimi dhe deri në këto momente nuk është marrë asnjë vendim konkret apo zyrtar nga Grupi Parlamentar i Partisë Demokratike. Opozita pritet të përcaktojë hapat e radhës në ditët në vijim, në varësi të zhvillimeve politike dhe parlamentare.