Kryeministri Edi Rama foli sot në Pragë, në kuadër të konferencës “GLOBSEC 2024,” ku trajtoi temën “Rajoni nën rrethim: Brishtësia e Ballkanit Perëndimor,” e moderuar nga Steve Clemons. Gjatë intervistës, Rama u pyet për sulmin kibernetik të vitit të kaluar ndaj Shqipërisë, për të cilin ai ofroi një pasqyrë të sfidave me të cilat përballen vendet në epokën dixhitale.
“Kemi arritur në një pikë ku duhet të pyesim veten se çfarë duhet të ndodhë që ta konsiderojmë luftën kibernetike si një luftë të mirëfilltë,” tha Rama. Ai shtoi se është thelbësore që të krijohet një kuadër rregullator i qartë për të trajtuar kërcënimet që vijnë nga bota dixhitale, duke përfshirë edhe ndikimin e mediave sociale tek fëmijët. “Jemi ende larg nga trajtimi i duhur i botës dixhitale në tërësi, e cila, ndërsa sjell shumë përfitime, gjithashtu paraqet kërcënime dhe pasoja të rënda,” shtoi ai.
Në vijim të intervistës, Rama u ndal te çështja e anëtarësimit të Shqipërisë në Bashkimin Evropian dhe te situata aktuale në Ballkanin Perëndimor. Ai theksoi se Shqipëria ka qenë gjithmonë një mbështetëse e paqes dhe dialogut në rajon.
“Shqipëria është në anë të paqes dhe dialogut. Besimi ynë i fortë është se nuk duhet ta shohim të ardhmen me sytë e së kaluarës,” tha Rama. Ai përmendi se Shqipëria ka promovuar gjithmonë paqen dhe dialogun, duke përfshirë nismat për të forcuar marrëdhëniet me Serbinë. Duke krahasuar gjendjen aktuale të Ballkanit Perëndimor me të kaluarën, Rama theksoi se rajoni është në një pozitë shumë më të mirë.
“Ballkani Perëndimor është në një pozitë shumë më të mirë se më parë. Ndërsa ka ende një hendek ekonomik që duhet mbushur, nuk shoh ndonjë ndryshim të madh mes nesh dhe Bashkimit Evropian,” tha Rama, duke shtuar se Shqipëria ka qenë dhe mbetet pjesë e Evropës dhe se vendimi për këtë nuk mund të merret vetëm në Bruksel.
