Një breshëri sulmesh ajrore ka lënë të paktën 32 të vrarë në Qytetin e Gazës më 14 shtator, sipas stafit mjekësor lokal. 12 prej viktimave janë fëmijë, raportoi spitali Shifa, ku u dërguan trupat e pajetë.

Një nga goditjet më të rënda ndodhi në lagjen Sheik Radvan, ku një shtëpi u shkatërrua duke vrarë një familje 10-anëtarëshe, mes tyre një nënë me tre fëmijët e saj.

Asociacioni Palestinez i Futbollit konfirmoi se gjatë bombardimeve humbi jetën edhe Mohammed Ramez Sultan, lojtar i klubit Al-Helal, së bashku me 14 anëtarë të familjes së tij.

Ushtria izraelite nuk ka komentuar ende për sulmet. Megjithatë, në ditët e fundit Izraeli ka intensifikuar bombardimet në mbarë qytetin, duke shkatërruar ndërtesa shumëkatëshe. Tel Avivi akuzon Hamasin se përdor këto objekte për pajisje të mbikëqyrjes dhe aktivitete ushtarake.

Izraeli ka bërë të ditur se synon marrjen e kontrollit të plotë të Qytetit të Gazës, një zonë urbane ku jetojnë rreth 1 milion banorë, sipas Kombeve të Bashkuara, të cilat kanë paralajmëruar për gjendje urie në këtë territor.

Një ditë më parë, ushtria izraelite njoftoi se kishte goditur një tjetër ndërtesë shumëkatëshe që, sipas saj, përdorej nga Hamasi. Banorëve iu është bërë thirrje të largohen nga qyteti për shkak të ofensivës në vijim.

Konflikti i nisur më 7 tetor 2023, kur Hamasi sulmoi jugun e Izraelit duke vrarë rreth 1.200 persona dhe rrëmbyer 251 të tjerë, ka marrë përmasa katastrofike. Si pasojë e ofensivës hakmarrëse izraelite, në Gazë kanë humbur jetën mbi 64.000 palestinezë, sipas Ministrisë së Shëndetësisë në territor – shifra që OKB i konsideron të besueshme.