Kreu i Lëvizjes Vetëvendosje, Albin Kurti, ka shpallur fitoren në zgjedhjet parlamentare të 28 dhjetorit, duke e cilësuar atë si “fitoren më të madhe në historinë e vendit”.

“Më 9 shkurt fitoi LVV-ja me partnerët, më 28 dhjetor fitoi populli i Kosovës dhe Republika”, deklaroi Kurti para mbështetësve, ndërsa theksoi se partia e tij është në rrugë për të tejkaluar rezultatin e zgjedhjeve të 14 shkurtit 2021, kur kishte marrë 50.2 për qind të votave.

Sipas Kurtit, rezultati i zgjedhjeve të së dielës kërkon veprim të shpejtë institucional. “Sa më parë që certifikohen rezultatet, aq më shpejt na duhet të krijojmë institucionet dhe të vazhdojmë me punën e mirë”, u shpreh ai.

Duke folur për sfidat e legjislaturës së re, Kurti tha se Qeverinë e ardhshme e pret zbatimi i Planit të Rritjes të Bashkimit Evropian në vlerë prej 880 milionë eurosh, si dhe tri marrëveshje me Bankën Botërore, që sipas tij kapin vlerën e mbi 1 miliard eurove. Në këtë kuadër, ai ftoi partitë opozitare për bashkëpunim në Kuvend, veçanërisht për ratifikimin e marrëveshjeve ndërkombëtare dhe miratimin e projektligjeve të rëndësishme.

Kurti u ndal edhe te çështja e zgjedhjes së presidentit të ri, duke thënë se është ende herët për të diskutuar konkretisht këtë temë. “Sonte do të festojmë”, tha ai, por shtoi se çështja e presidentit duhet trajtuar në bashkëbisedim me opozitën dhe me presidenten aktuale, Vjosa Osmani, së cilës i përfundon mandati në mars.

I pyetur nëse do të negociojë me opozitën për presidentin dhe nëse kjo e fundit mund të propozojë kandidatin, Kurti theksoi se negociimi dhe dorëzimi i vendimmarrjes janë dy gjëra të ndryshme. “Natyrisht që duhet ta bisedojmë me opozitën këtë çështje. Por paraprakisht duhet të diskutojmë për marrëveshjet ndërkombëtare. Ato do të jenë testi i parë serioz i bashkëpunimit qeveri-opozitë në katërvjeçarin e ardhshëm”, u shpreh Kurti, duke nënvizuar se fillimisht pritet certifikimi i rezultateve zgjedhore.