Sipas “El Partidazo de Cope”, La Liga ka paraqitur një padi ndaj Real Madridit pranë Komitetit të Disiplinës së Federatës Mbretërore Spanjolle të Futbollit.
Padia lidhet me një letër të dërguar nga klubi madrilen pas ndeshjes kundër Espanyolit, ku kritikohej arbitrimi dhe vihej në dyshim integriteti i garës, veçanërisht për mosndëshkimin me karton të kuq të Romeros pas një ndërhyrjeje ndaj Kylian Mbappé.
Me pranimin e padisë, Real Madridit do t’i kërkohen shpjegime dhe do të nisë një hetim disiplinor. Nëse procesi përfundon me një vendim kundër “Los Blancos”, atëherë klubi mund të përballet me masa ndëshkuese nga federata spanjolle.
Presidenti i La Liga-s: “UEFA po krijon një oligarki klubesh”
Në një intervistë për gazetën gjermane “Süddeutsche Zeitung”, presidenti i La Liga-s ka kritikuar ndarjen e premiove nga UEFA për Champions League dhe Botërorin e Klubeve.
Sipas tij, ky sistem favorizon një grup të vogël klubesh, duke rritur diferencat me pjesën tjetër:
“Me këtë ritëm, ligat europiane do të dominohen nga një grusht skuadrash që do të pasurohen gjithnjë e më shumë.”
Kjo deklaratë pason shqetësimet e ngritura nga disa klube të tjera në lidhje me përqendrimin e pasurisë dhe fuqisë sportive në disa prej skuadrave më të mëdha të Evropës.
