Labubu, lodra koleksionuese që u shndërrua në fenomen global falë rrjeteve sociale dhe kulturës së “blind box”, pritet të kalojë në ekranin e madh. Sony Pictures po zhvillon një film të bazuar në universin e Labubu, me regjisorin e “Paddington” dhe “Wonka”, Paul King, të përfshirë si regjisor dhe producent.

Sipas raportimeve, projekti ndodhet ende në fazat e hershme të zhvillimit. Aktualisht nuk ka një skenarist të konfirmuar, ndërsa King do ta realizojë filmin në bashkëpunim me Department M dhe Wenxin She. Sony ka siguruar të drejtat kinematografike të IP-së së Labubu muajin e kaluar dhe po punon ngushtë me Pop Mart, kompania kineze që zotëron dhe menaxhon linjën e lodrave.

Labubu u krijua fillimisht nga artisti me origjinë nga Hong Kongu, Kasing Lung, dhe u prodhua në fillim nga firma How2Work. Megjithatë, popullariteti i vërtetë shpërtheu në vitin 2019, kur Pop Mart mori përsipër prodhimin dhe shpërndarjen, duke e kthyer figurën në një nga objektet më të kërkuara të kulturës së koleksionimit.

Fenomeni Labubu u shty përpara nga dy elementë kryesorë. I pari ishte koncepti i “blind boxes”, ku blerësi nuk e di se cilin model ka derisa e hap kutinë – një mekanizëm që krijoi varësi, por edhe një treg të dytë ku disa figura shiten për shuma shumë të larta. I dyti ishte hyrja e Labubu në “mainstream”, pasi u shfaq si aksesor edhe te figura të njohura të pop-kulturës, duke rritur statusin e tij si “it item”.

Nëse projekti ecën sipas pritshmërive, Labubu mund të ndjekë rrugën e shumë fenomeneve të tjera moderne: nga obsesion interneti dhe lodër koleksionuese, në personazh kinematografik me një histori të ndërtuar për publikun e gjerë.