Rilind Berisha, një emër i njohur në futbollin kosovar, është ndarë nga jeta në moshën 27-vjeçare. Ai dha një kontribut të rëndësishëm në Ligën e Dytë vendore si gjyqtar, ndërsa kishte qenë edhe futbollist i talentuar.

Presidenti i Federatës së Futbollit të Kosovës, Agim Ademi, ka shprehur ngushëllimet e tij në emër të komunitetit të futbollit kosovar. Në një telegram ngushëllimi, Ademi ka theksuar trishtimin e thellë që ka shkaktuar humbja e një personaliteti të përkushtuar ndaj futbollit, siç ishte Rilind Berisha. Ai e ka cilësuar Berishën si një futbollist dhe gjyqtar të përkushtuar, i cili la gjurmë të pashlyeshme në komunitetin e futbollit në Kosovë.

“Ikja e hershme nga kjo botë e një personaliteti të përkushtuar ndaj futbollit, ka trishtuar të gjithë komunitetin e futbollit në Kosovë. Rilindi ishte një futbollist i përkushtuar, por edhe një gjyqtar premtues, i cili dha kontribut të çmuar në ndarjen e drejtësisë në Ligën e Dytë,” ka shkruar Ademi, duke shprehur ngushëllimet më të sinqerta për familjen e tij dhe për gjithë komunitetin e futbollit.

Ky lajm ka trishtuar jo vetëm familjen Berisha, por edhe të gjithë ata që e njihnin Rilindin si një njeri të përkushtuar dhe shembullor. I lehtë i qoftë dheu i Kosovës!